Síða

Hitakassinn

Tónlistarborgin Reykjavík í samstarfi við Hitt Húsið og Útflutningsskrifstofu íslenskrar tónlistar bjóða fulltrúum atriðanna sem komast áfram í úrslit á Músíktilraunum 2019 til þátttöku í skemmtilegu og hagnýtu námskeiði um tónlistariðnaðinn sem fram fer í apríl, maí og júní.

 

Það er til mikils að vinna því á námskeiðinu sem byggist upp á skemmtilegum fyrirlestrum, pallborðsumræðum, vettvangsheimsóknum og hagnýtum verkefnum verður farið yfir allt það helsta sem tónlistarfólk ætti að vita um tónlistariðnaðinn.

 

Þátttakendur fá aðstoð við gerð kynningarefnis og tæknilista og úrlausn tækniatriða með fagfólki. Einnig verður mikil áhersla lögð á að efla tengslanet þátttakenda innan íslenska tónlistariðnaðarins með gestafyrirlesurum og góðum heimsóknum, auk þess fær hvert atriði sinn ráðgjafa / mentor úr íslensku tónlistarlífi.

 

Á lokakvöldi námskeiðsins koma hljómsveitirnar fram og leika tvö lög hver fyrir íslenska tónlistariðnaðinn. Markmiðið með Hitakassanum er að valdefla ungt tónlistarfólk sem er að stíga sín fyrstu skref í tónlistinni með því að auka þekkingu þess á tónlistariðnaðinum þannig að það verði betur í stakk búið til að þróa sinn feril og taka góðar ákvarðanir varðandi hann strax í upphafi.

 

Hópurinn hittist í alls 10 skipti og fer kennslan fram í húsnæði ÚTÓN og Tónlistarborgarinnar að Laugavegi 105, í Hinu Húsinu og víðar.